Respublika «Hunarmand» uyushmasi raisi R.Mirzaaxmedov «Salsola Design» galereyasi asoschilari Erica Zhou va Simon Sunlarni qabul qildi.
Uchrashuvda mehmonlar joriy yilning sentyabr oyida Fransiya davlatida o‘tkaziladigan “Maison&objet paris” nomli dunyodagi eng yirik mebel va uy-joy ko‘rgazmalaridan birida mebel brendi tashkilotchilari sifatida ishtirok etishlarini bildirdi. Ushbu ko‘rgazma o‘tkaziladigan maydondan «Salsola Design» galereyasi ham 100 kv metr joy olgan bo‘lib, ushbu ko’rgazma pavilyonida Markaziy Osiyo, shu jumladan O‘zbekiston hunarmandchiligini ham kreativ usulda namoyish etishni maqsad qilgan.
Shu bilan birgalikda 2026-yilning yanvar oyida Fransiyada yana bir hunarmandchilik ko‘rgazma-savdosida ham O‘zbekiston hunarmandlarining ishtiroki hamda hunarmandchilik mahsulotlarini namoyish etish taklifini berishdi.
Uchrashuv yakunida “Hunarmand” uyushmasi hamda «Salsola Design» galereyasi bilan hamkorlikda ish olib borishga kelishib olindi.
